У гэтыя красавіцкія дні ўдзельнікі аўтаклуба “BMW Club Brest region” наведалі сацыяльны прытулак у пасёлку Пелішча Камянецкага раёна. Уладальнікі “бумераў”неаднойчы праводзілі дабрачынныя акцыі, дапамагаючы дзецям. А вось паездка ў Пелішча была першай, і арганізавана яна сумесна з валанцёрамі арганізацыі “Пасланцы дабра”. Гасцей тут вельмі чакалі, таму, як толькі калона аўтамабіляў наблізілася да прытулку, дзеці высыпалі на вуліцу сустракаць новых сяброў.
– Такія паездкі сталі ўжо добрай традыцыяй, – адзначыў каардынатар клуба “BMW Club Brest region” Юрый Сегянюк. – Мы робім гэта дзеля таго, каб падарыць дзецям казку, якой так не хапае ў паўсядзённасці. І тое, што бачым усмешкі і вялікую радасць у вачах дзяцей, значыць, што наша справа добрая.
Аматары машын маркі “БМВ” прыехалі не з пустымі рукамі. Яны прывезі падарункі, цукеркі, фрукты. Валанцёры арганізавалі самадзейны канцэрт са шматлікімі конкурсамі, майстар-класамі і гульнямі. Акрамя таго, разам з імі прыехалі дзве дзяўчыны-цырульнікі, якія падарылі выхаванцам прытулку модныя стрыжкі.
Дзеці ахвотна асвойвалі аўта- і мотатэхніку. Пракаціцца на модных аўто змаглі ўсе жадаючыя. Шмат гаварылі, жартавалі і ўвогуле добра бавілі час.
– Ні адзін дзень майго жыцця не абыходзіцца без дабрачыннас-ці, – расказала валанцёр Марыя Галачапава. – Цудоўна, што часта сустракаюцца аднадумцы, якія далучаюцца да гэтых добрых спраў. Толькі разам мы зможам тварыць усё больш і больш дабра і дарыць яго тым, хто патрабуе ўвагі.
Аўтасезон-2012 адкрыты. “Бумеры” паехалі, але абавязкова вернуцца, зноў прывязуць пазітыў і добры настрой. Да новых сустрэч!
Вольга СВІРЫДОВІЧ, “НТ”,
Камянецкі раён.
Фота аўтара.
Loading ...
Наш свет разнастайны. Ён не стамляецца здзіўляць, пужаць і радаваць нас. Вось такой дабрачыннасцю таксама радуе, калі маладыя людзі не застаюцца абыякавымі да тых, хто побач і каму сёння прыходзіцца цяжкавата.Такія сустрэчы абавязкова паўплываюць і на выхаванцаў сацыяльнага прытулку. я пераканана, што немалое значэнне ў станаўленні чалавека як асобы адыгрывае сям’я, сябры, аднакласнікі. А яшчэ – незнаёмыя людзі, сваімі добрымі ўчынкамі. Справы часта гавораць значна больш, чым словы.Пад уплывам гэтых людзей фарміруецца характар, манера паводзін, нездарма ж кажуць: «з кім павядзешся ад таго і набярэшся». Я думаю, трэба сябраваць з тымі людзьмі, на якіх ты хочаш быць падобным, якія зразумеюць і дапамогуць у складанай сітуацыі. Пры ўмове, што ты будзеш сябраваць з добрымі людзьмі, ты абавязкова станеш дастойным грамадзянінам сваёй краіны.
Андрыевіч Вікторыя